26 nəfər xəstəxanalara yerləşdirilib
Azərbaycan Baş Prokurorluğu sentyabrın 28-də cəbhədəki vəziyyətlə bağlı məlumat yayıb.
Qurumun mətbuat xidmətindən bildiriblər ki, son günlər hazırkı vaxtadək ümumilikdə mülki əhalidən 26 nəfər müxtəlif dərəcəli bədən xəsarətləri alaraq xəstəxanalara yerləşdirilib.
Bildirilir ki, səhər saat 7 radələrindən başlayaraq Tərtər rayonunun mərkəzi, o cümlədən əhalinin sıx yaşadığı kəndlər ağır artilleriyadan intensiv atəşə tutulub: "Azad Qaraqoyunlu kənd sakinləri Əhmədov Mayıl Ələsgər oğlu, Salahov Nizami Məcid oğlu, Kərimov Elşən Şahmat oğluna məxsus evlərə külli miqdarda ziyan dəyib, rayonun əsas strateji körpüsü və polis şöbəsinə zərbələr endirilib".
Bundan başqa, bildirildiyinə görə, Tərtər şəhəri E.Səfərov küçəsi 54 mənzildən ibarət 10 saylı binası, rayonun Şıxarx qəsəbəsində 16 saylı çoxmənzilli yaşayış binası yararsız vəziyyətə düşüb, bina sakinləri təxliyə olunub.
"Həmçinin işğalçı ölkənin qüvvələrinin intensiv atəşi nəticəsində Tərtər rayonunun Səhləbad kəndində Ağayev Bəxtiyar Rəhim oğluna, Yuxarı Qapanlı kənd sakini Rəsmiyyə Həsənovaya məxsus yardımçı tikililərə top mərmilərinin düşməsi nəticəsində çoxsaylı xırda və iribuynuzlu heyvan tələf olub. Hazırda Prokurorluğun əməkdaşları tərəfindən döyüş şəraitində mümkün olan bütün istintaq əməliyyat tədbirləri həyata keçirilir...".
Qurum dünən, sentyabrın 27-də bildirmişdi ki, top atəşi nəticəsində Naftalanda bir ailənin 5 üzvü həlak olub.
Baş Prokurorluq hərbi qulluqçular arasında da ölən və yaralananların olduğunu bildirir. Amma bununla bağlı dəqiq say göstərilmir.
"ABŞ şiddətin artmasını ən sərt şəkildə qınayır"
Amerika Birləşmiş Ştatlarının (ABŞ) Bakıdakı səfirliyi Azərbaycan və Ermənistan arasında zorakılığın artması barədə bəyanat yayıb.
Sənəddə yazılıb ki, Dağlıq Qarabağ münaqişəsi zonasında təmas xətti boyunca mülki şəxslər də daxil olmaqla, çoxsaylı itkilərlə nəticələnən genişmiqyaslı hərbi əməliyyatlar barədə məlumatlar ABŞ-ı narahat edir: "Ölən və yaralananların ailələrinə başsağlığı veririk. ABŞ şiddətin artmasını ən sərt şəkildə qınayır".
Bəyanata görə, ABŞ Dövlət katibinin birinci müavini Stiven Biqan Azərbaycan Xarici İşlər naziri Ceyhun Bayramov və Ermənistan Xarici İşlər naziri Zöhrab Mnatsakanyanla əlaqə saxlayıb: "O, hər iki tərəfi dərhal hərbi əməliyyatları dayandırmağa, vəziyyəti daha da gərginləşdirməmək üçün aralarındakı mövcud birbaşa rabitə əlaqələrindən istifadə etməyə və regiondakı gərginliyi daha da artıran ritorika və hərəkətlərdən uzaq olmağa çağırdı".
Vilayət Eyvazov komendant təyin edildi
Sentyabrın 28-də Azərbaycan Prezidenti İlham Əliyev hərbi vəziyyət dövründə komendant saatının tətbiq edildiyi ərazilərin komendantının təyin olunması ilə bağlı sərəncam imzalayıb.
Sərəncama əsasən, Daxili İşlər naziri Vilayət Eyvazov hərbi vəziyyət dövründə komendant saatının tətbiq olunduğu ərazilərin komendantı təyin edilib.
Dünən sentyabrın 28-dən bütün ölkə ərazisində hərbi vəziyyət, Bakı və bir sıra yerlərdə isə komendant saatının tətbiq ediləcəyi bildirilib. Bura Bakı, Gəncə, Sumqayıt, Yevlax, Mingəçevir, Naftalan şəhərləri, Abşeron, Cəbrayıl, Füzuli, Ağcabədi, Beyləqan, Ağdam, Bərdə, Tərtər, Goranboy, Göygöl, Daşkəsən, Gədəbəy, Tovuz, Şəmkir, Qazax və Ağstafa rayonları daxildir. Komendant saatı 21:00-dan saat 06:00-dək tətbiq edilir.
"Qrad" zərbələrindən Ağdam sakini həlak olub
Baş Prokurorluğunun Mətbuat xidməti sentyabrın 28-də cəbhədəki vəziyyətlə bağlı növbəti açıqlama yayıb
Məlumatda yazılıb ki, hazırkı vaxtadək ümumilikdə mülki əhalidən 27 nəfər müxtəlif dərəcəli bədən xəsarətləri alaraq xəstəxanalara yerləşdirilib
Baş Prokurorluq bildirir ki, bu gün, sentyabrın 28-də Azərbaycan əhalisinin sıx yaşadığı ərazilərin növbəti dəfə "Qrad" qurğularından atəşə tutulması nəticəsində Ağdam rayonu, Evoğlu kənd sakini 1979-cu il təvəllüdlü Coşqun Paşayev həlak olub.
Faktla bağlı Ağdam rayon Prokurorluğunda Azərbaycan Respublikasının Cinayət Məcəlləsinə uyğun cinayət işi başlandığı bildirilir.
Bundan əvvəl qurum son günlər cəbhə bölgəsində 26 mülkü şəxsin yaralandığını açıqlamışdı.
Baş Prokurorluq dünən, sentyabrın 27-də də bildirmişdi ki, top atəşi nəticəsində Naftalanda bir ailənin 5 üzvü həlak olub.
