26 yanvar etirazlarının xronologiyası [Video-Foto]

İsmayıllı hadisələri ilə bağlı şahid qismində tanınan Vasif İbrahimov Bakıya Daxili İşlər Nazirliyinin Mütəşəkkil Cinayətkarlığa qarşı Mübarizə İdarəsinə gətirilib və sonra da həbs edilib. Vəkili Nəvaid Abbasov yanvarın 26-da Bakıya gəlib onunla görüşmək istəsə də, görüş verilməyib.

Bu barədə AzadlıqRadiosuna vəkili özü məlumat verib.

«Şahidi niyə həbs edirlər mənə aydın deyil. Bir də mənə dedilər, gəl, Bakıya görüş veriləcək. Amma çox cəhd etdim görüş vermədilər. Dedilər işi aparan müstəntiqin başı qarışıqdır, vaxtı yoxdur. Mən 20 ildir vəkillik fəaliyyəti ilə məşğulam. Birinci dəfədir belə halla üzləşirəm. Niyə müdafiə etdiyim adamlar görüşə bilməyim ki? Burda nə var ki?».

İsmayıllı rayon İcra Hakimiyyətindən rayonda tam sakitlik olduğu bildirilir. Amma ayrı-ayrı sakinlərdən aldığımız məlumatlara görə, sakitlik olsa da, həbslər davam etməkdədir.

Nəsimi rayon Məhkəməsi bloqqer Emin Milli barəsində 15 sutka inzibati həbs qərarı verib.

Jurnalist Şahvələd Çobanoğlu və daha bir neçə nəfər avtobusla Bakının Lökbatan qəsəbəsinə aparılıb və orda sərbəst buraxılıb.

Nəsimi rayon Məhkəməsindən buraxılanların bəziləri cərimə olunub. Bəzilərinə ilə bağlı proses isə təxirə salınıb. Onlara yanvarın 28-də məhkəməyə gəlmək tapşırılıb.

AXCP sədrinin müavini Gözəl Bayramlı aksiyanın təşkilatçısı kimi 2000 manat cərimə edilib. Şahid qismində ifadə verən polis əməkdaşı deyib ki, Gözəl Bayramlı hamını aksiyaya çağırırdı. Gözəl Bayramlı isə deyir ki, o, aksiyanın təşkilatçısı olmayıb və heç kimi də aksiyaya çağırmayıb, sadəcə iştirakçı olub, İsmayıllıda insanlara qarşı təzyiqlərə etiraz edib.