Britaniya, Fransa və Almaniya Rusiyaya qarşı sanksiyalara razılaşırlar

Britaniya, Fransa və Almaniya liderləri telefonla danışıb. Onlar razılığa gəliblər ki, əgər Rusiya prezidenti Vladimir Putin rusiyameylli separatçıların müfəttişləri Malayziya təyyarəsinin qəzaya uğradığı əraziyə buraxmasına nail olmasa, Rusiyaya əlavə sanksiya qoysunlar.

Fransa prezidenti Francois Hollande-nın ofisi iyulun 20-də bu telefon söhbəti barədə məlumat yayıb. Məlumata görə, o, Angela Merkel və David Cameron Putin qarşısında belə bir tələb qoymaq barədə razılığa gəliblər.

Bəyanatda deyilir ki, «Rusiya dərhal gərəkli tədbirlər görməsə, Avropa Birliyi iyulun 22-də Xarici İşlər Şurasında nəticələr çıxaracaq».

SEPARATÇILAR NƏYİ GİZLƏDƏ BİLƏRLƏR?

298 nəfərin ölümü ilə nəticələn MH17 təyyarəsinin qəzasından sonra mütəxəssislər hadisə yerinin mühafizəsiz qalmasından narahatlıq bildiriblər. 25 kvadrat kilometrlik bir ərazidə ancaq kiçik sahələr separatçıların mühafizəsinə götürülüb. Hadisə yerinə səfər edən Qərb jurnalistləri onlarla başlı-başına qalmış təyyarə parçalarını, meyidlər gördüklərini yazırlar. Təyyarənin qara qutularının və bəzi meyidlərin Donetskə aparılması bildirilr. Ukrayna Təhlükəsizlik xidmətinin veteranı Yevgeniy Marchuk özünün FB səhifəsində yazır ki, belə hallarda bəzi meyidlərdə təyyarəni vuran raketin qəlpələri olur. Sərnişin siyahısı ilə həmin meyidlərin hansı oturacaqda olduğunu müəyyənləşdirib, raketin təyyarəyə hansı bucaq altında dəydiyini hesablamaq olar. Bu məlumat isə öz növbəsində, raketin trayektoriyasını və atəş nöqtəsini aydınlaşdırmağa kömək edir. Marchuk hesab edir ki, separatçıların hadisə yerində işləyən mütəxəssisləri belə meyidləri aşkar edib, onları beynəlxalq təhqiqatdan gizlədə və ya məhv edə bilərlər. Onun daha bir iddiasına görə, təyyarənin qara qutularını Donetskə aparan şəxslər oradakı məlumatları poza və ya dəyişə bilərlər.