Yaxşı oğlan...
Boris Nemtsov-un vəkil Vadim Prokhorov AzadlıqRadiosunun rus xidmətinə bildirib ki, Nemtsov dəfələrlə, əsasən, sosial şəbəkələrdən hədələnib:
«Tətiyi kimin çəkməsindən asılı olmayaraq, Boris Nemtsov-u siyasi rejim öldürdü».
Müxalifyönlü deputat Dmitry Gudkov «Twitter» hesabında yazır: «Ayındır ki, bu, siyasi qətldir. Sifariş verilməsə belə, hakimiyyətin səpdiyi nifrət toxumunun nəticəsidir».
O, Putin-in sərt tənqidçisi idi. Rusiya prezidentini 2013-cü ildə Soçi olimpiadasında milyardlarla dollarlıq korrupsiyada ittiham edib. Kreml bu ittihamları rədd edirdi.
Sürgün edilən keçmiş rus maqnatı Mikhail Khodorkovsky «Twitter»də yazıb ki, onun ailəsi kədər içindədir: «Biz hamimiz onu sevirdik. O, yaxşı oğlan idi».
ABŞ-ın Rusiyadakı keçmiş səfiri Michael McFaul sosial şəbəkədə yazıb: «O, əsl vətənpərvər idi. Mən onun ailəsi və çox sevdiyi vətəni üçün göz yaşı axıdıram».
Nemtsov-un qətlə yetirildiyi əraziyə fövqəladə halların əməkdaşları gəlib.
Yanğınsöndürənlər küçəni təmizləmək üçün su şlanqlarından istifadə edib. Onun öldürüldüyü yerə isə çoxlu adam yığışıb.
Demokratik hərəkata zərbə
Müsavat Partiyasının yaydığı bəyanatda deyilir ki, Rusiya Respublikaçılar Xalq Azadlıq Partiyası-«Parnas»ın həmsədri və Rusiyada «Solidarnost» Demokratik Hərəkatının Koordinasiya Komitəsinin üzvü olan Boris Nemtsov Rusiyanın demokratikləşməsi uğrunda mübarizənin liderlərindən biri idi:
«B.Nemtsov həmçinin Rusiya demokratlarının postsovet məkanındakı aparıcı demokratik qüvvələrlə, o cümlədən Müsavat Partiyası ilə əlaqələrə xüsusi önəm verən liderlərindən olub. Rusiyada prezident Putin-in əsas rəqiblərindən olan Nemtsov-un qətlə yetirilməsi yalnız Rusiya üçün yox, bütün dünyada demokratik dəyərlər uğrunda mübarizə aparanlara zərbədir».
«Müsavat bu ağır gündə Rusiyanın demokratik qüvvələrinə dəstəyini bildirir, bütün demokratik qüvvələri bəyan etdikləri hədəflər uğrunda daha qətiyyətlə mübarizə aparmağa çağirir», -deyə bəyanatda bildirilir.
Nemtsov-un qətlinə politoloq Ərəstun Oruclunun şərhi
«Bir neçə saat əvvəl Moskvanın mərkəzində, Kremlin 2 addımlığında Rusiya hakimiyyətinin kəskin tənqidçisi, görkəmli müxalif siyasətçi Boris Nemtsov tapançadan açılan bir neçə atəşlə qətlə yetirilib. Qətlin arxasınca Nemtsov-un cəsədi hələ hadisə yerində ikən açıqlama verən Rusiya prezidenti Vladimir Putin «qətlin sifarişlı olduğunu və təxribat məqsədilə həyata keçirildiyini» deyib.
Tarixdə:
Təxminən 10 il əvvəl axşam saatlarında Bakıda, yaşadığı binanın giriş qapısında Azərbaycan hakimiyyətinin kəskin tənqidçisi, tanınmış jurnalist, «Monitor» jurnalının baş redaktoru Elmar Hüseynov tapançadan açılan bir neçə atəşlə qətlə yetirildi. Hadisə yerinə gələn dövlət rəsmisi (Bakı BPİ-nin o zamankı rəisi, general-leytenant Məhərrəm Əliyev) «qətlin sifarişli olduğunu və təxribat məqsədilə həyata keçirildiyini» dedi.
P.S.: Elmar Hüseynovun qətlinin istintaqı bu günədək davam edir...».