-
Prezident İlham Əliyev sentyabrın 30-da Baş Prokurorluğun bir qrup əməkdaşının təltif edilməsi haqqında sərəncam imzalayıb. Sərəncamda deyilir ki, onlar «Azərbaycanda qanunçuluğun təmin edilməsində, ağır və xüsusilə ağır cinayətlərin istintaqının aparılmasında və bu cinayətlərin açılmasında, korrupsiyaya qarşı mübarizə aparılmasında, məhkəmədə dövlət ittihamının müdafiə olunmasında xidmətlərinə görə» təltif olunurlar.
Siyahıya nəzər salanda məlum olur ki, son illərdə Azərbaycandakı səs-küylü həbslərlə bağlı işlərin istintaqını aparmış müstəntiqlər də prezidentin diqqətinə layiq görülənlər sırasındadır. Məsələn, Baş Prokurorluğun Ağır Cinayətlərə Dair İşlər üzrə İstintaq İdarəsinin mühüm işlər üzrə müstəntiqi Sənan Paşayev. «Dövlət qulluğunda fərqlənməyə görə» medalı ilə təltif olunanlar arasında onun da adı var.
Sənan Paşayev hazırda həbsdə olan hüquq müdafiəçiləri Leyla Yunus, İntiqam Əliyev, araşdırmaçı-jurnalist Xədicə İsmayıl, həmçinin AzadlıqRadiosunun fəaliyyəti ilə bağlı istintaqı aparmış müstəntiqlərdən biridir. Ötən il dekabrın 26-da radionun Bakı bürosunun ofisində axtarış-möhürlənmə işində o da iştirak edirdi.
Xədicə İsmayılın işi üzrə istintaqda iştirak edən daha bir müstəntiq – Orxan Babayev də təltif olunanlardandır. O da Baş Prokurorluğun Ağır Cinayətlərə Dair İşlər üzrə İstintaq İdarəsinin əməkdaşıdır. Vəkil Yalçın İmanovun Xədicə İsmayılın hüquqlarının müdafiəsindən uzaqlaşdırılması məsələsini də məhkəmədə məhz bu müstəntiq qaldırmış və nəticədə vəkil prosesdən kənarlaşdırılmışdı.
29 NƏFƏR FƏRQLƏNDİ
Bu idarənin adı tez-tez mətbuatda hallanan müstəntiqlərindən biri də Qasım Məmmədovdur ki, «Dövlət qulluğunda fərqlənməyə görə» medalı alanların siyahısında o da var. Qasım Məmmədovun adı hələ 2013-cü ildə NİDA Vətəndaş Hərəkatı fəallarının həbsindən tutmuş, «Tolışi-sədo» qəzetinin baş redaktoru Hilal Məmmədov, jurnalist Rauf Mirqədirovadək bir çox səs-küylü istintaq işlərində keçir. Avqustda Mingəçevirdə etiraz aksiyası ilə bağlı işi aparan, həmçinin Meydan TV ilə əməkdaşlıq edən jurnalistləri sentyabrın əvvəllərindən başlayaq istintaqa cəlb edib dindirənlərdən biri də Qasım Məmmədovdur.
Keçmiş deputat Gülər Əhmədovanın işi üzrə istintaqı aparmış Bakı Şəhər Prokurorluğunun müstəntiqi Emzar Qocayev də «Dövlət qulluğunda fərqlənməyə görə» medalına layiq görülənlərdən biridir.
Təltif olunanların tam siyahısı
«İgidliyə görə» medalı ilə:
Abdullayev Abdulla Həndəm oğlu
Bayramlı Qəzənfər Məmməd oğlu
Qubadov Səyyaf Mövsüm oğlu
Muradov Namiq Səyavuş oğlu
«Dövlət qulluğunda fərqlənməyə görə» medalı ilə:
Abbasov Müşfiq Elman oğlu
Ağayev İsmayıl Ramiz oğlu
Aslanov Ədalət Kərəm oğlu
Azadəliyev Seyhun Cəbrayıl oğlu
Babayev Orxan Zahid oğlu
Əliyev Aydın Zöhrab oğlu
İsmayılov Tahir Sabir oğlu
Qafarov Ramiz Surxay oğlu
Qasımlı Mehman Balamirzə oğlu
Qocayev Emzar Eldar oğlu
Məmmədov Qasım Yasin oğlu
Mirzəyev Rəşad Ziyafət oğlu
Musayev Elnur Novruz oğlu
Musayev Fuad Möhübbət oğlu
Paşayev Sənan İsa oğlu
Rəhimov Daşqın Hidayət oğlu
Rüstəmov Xəyyam Yaqub oğlu
Rzayev Səttar Firid oğlu
Səfərov Faiq Rəsul oğlu
Süleymanov Rəfael Mürşüd oğlu
Şıxəliyev Nihad Ənvər oğlu
Dövlət başçısının digər sərəncamı ilə Azərbaycan Respublikası Prokurorluğunun aşağıdakı əməkdaşlarına III dərəcəli dövlət ədliyyə müşaviri ali xüsusi rütbəsi verilib:
Rəcəbov Nazim Hafiz oğlu – Azərbaycan Respublikası Baş Prokurorluğunun Kadrlar idarəsinin rəisi.
Abbasov Elşən Akif oğlu – Azərbaycan Respublikası Baş Prokurorluğunun Milli Təhlükəsizlik və Fövqəladə Hallar nazirlikləri, Dövlət Sərhəd Xidmətinin istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəisi.
Məcidov Ramil Abbas oğlu – Azərbaycan Respublikası Baş Prokurorluğunun Ədliyyə və Vergilər nazirlikləri, Dövlət Gömrük Komitəsinin istintaq, təhqiqat və əməliyyat-axtarış fəaliyyətində qanunların icrasına nəzarət idarəsinin rəisi
Məmmədov Anar Rəhim oğlu – Azərbaycan Respublikası Baş Prokurorluğunun Müraciətlərə baxılması idarəsinin rəisi.
