Həbsdə olan keçmiş baş prokuror və səfir Eldar Həsənovun vəziyyəti öz məhkəməsində pisləşib.
O, məhkəmə zalında ifadə verərkən müvazinətini itirərək yıxılıb. Bu, sentyabrın 13-də Bakı Ağır Cinayətlər Məhkəməsində baş verib.
“Gəlib özləri baxmışdılar, dördünü bəyənmişdilər”
Hələ məhkəmə iclasının əvvəlində Həsənov hakimlərdən xahiş edib ki, onun işinə həftədə bir dəfə baxılsın.
Çünki həftədə iki dəfə DTX-nın istintaq təcridxanasından məhkəməyə aparılıb-gətirilməsinə sağlıq durumu imkan vermir.
Həsənova verilən ittihamlardan biri də səfir olduğu ölkələrdə səfirlik üçün binaların alınması prosesində milyonlarla büdcə vəsaitinin yeyintisilə bağlıdır.
Bu ittihama münasibət bildirən keçmiş səfir bildirib ki, binaların alınması, seçilməsi prosesinə səfirliyin aidiyyəti olmayıb. Bu işləri Bakıdan gələn komissiya həll edib. Komissiyanın sədri də xarici işlər nazirinin müavini olub:
“Belqradda 6 bina təklif olunmuşdu, gəlib özləri baxmışdılar, dördünü bəyənmişdilər. O 4 bina arasından necə seçim edilib, necə alınıb – mən o proseslərdə iştirak eləməmişəm. Aktda da nə mənim, nə də səfirlik əməkdaşlarının imzası var. Əmlak sahibi də ifadəsində təsdiqləyib ki, prosesdə mənim rolum olmayıb”.
“Bina 4 milyona alınıb”
Təqsirləndirilən Həsənovun sözlərinə görə, elə hallar olurdu ki, əmlak sahibi pulun bir hissəsini nağd şəkildə almaq istəyirdi.
Belqradda alınan binanın sahibi də ifadəsində etiraf edib ki, vergini çox ödəməmək üçün pulun bir hissəsini nağd alıb.
Keçmiş səfir deyir ki, Monteneqrodakı binanın sahibi iki qardaş olub. Onlardan biri pulu nağd istəyib, digəri isə bank hesabına köçürülməsini tələb edib:
“Çox mötəbər şəxsin köməkçisilə əlaqə saxlayıb, məlumat verdim ki, belə bir problem var. Onlar problemi özləri həll elədilər. Qardaşın birinə pulu nağd ödədilər, o birinə köçürmə yolu ilə. Obyekt sahibi ifadəsində bildirib ki, binanı 3 milyona istədilər, vermədim. Bina 4 milyona alınıb. Əgər adam öz diliylə deyirsə ki, 3 milyona verməmişəm, müstəntiq 4 milyondan 1.4 milyon yeyintini necə çıxarıb? 24 il hüquq-mühafizə orqanlarında müxtəlif vəzifələrdə işləmişəm, amma bu işdəki qədər saxtakarlığa rast gəlməmişəm...”
“Aşur ortada vasitəçidir”
Bosniya və Herseqovinadakı səfirlik binası haqda danışan Həsənov bildirib ki, Sarayevo küçəsindəki evin alınmasıyla bağlı İqtisadiyyat Nazirliyinin rəhbərliyilə komissiya yaradılıb. Beş nəfərdən ibarət komissiya gəlib, seçim edib. O binanın da pulunun bir hissəsi nağd ödənilib:
“Bir hissəsini isə “Scana” şirkətinə köçürüblər. Bu şirkətin hesabı da Aşur adlı azərbaycanlının adına olub. Müstəntiq bunu araşdırmır ki, Böyük Britaniyada qeydiyyatdan keçmiş həmin ofşor şirkət kimin olub. Sahibi də bəllidir. Aşur isə ortada vasitəçidir, sadəcə, pul onun hesabına köçürülür. Ona da bu köçürməyə görə bir neçə yüz dollar pul verilir”.
50 cildlik iş materiallarında heç bir sübut, lazımi sənədlərin olmadığını deyən sabiq baş prokurorun sözlərinə görə, ona humanitar layihələrlə bağlı da ittiham verilib. Amma səfir və səfirlik əməkdaşlarının həmin layihələrə, vəsaitin xərclənməsinə heç bir aidiyyəti olmayıb.
“Bu qədər qanunsuzluq, qəddarlıq olarmı?! Mən dözməyə çalışıram, amma mənim yerimə fələk oğlu fələk də dözməz bu haqsızlıqlara. Mən hər kəsə sözümü çəkinmədən deyən insan olmuşam, kimsənin arxasınca danışmıram. Arzu edərdim ki, istintaqı aparan burada olsun, onun üzünə deyim bunları. Deyirlər ki, danışdıqların prokurorluğun adına xələl gətirir. Mən prokurorluğun yağ-bal içində olduğu vaxtda işləməmişəm, gülləbaran edildiyi, silahlı hücumlar olduğu vaxtda sinəmi qabağa vermişəm...”
“Mənə ağıl öyrətməyin”
Prokuror təqsirləndirilən şəxsin ittihamın mahiyyətindən kənara çıxdığını iddia edib:
“Xahiş edirəm, ittihamın mahiyyətindən danışsın”.
Bu zaman dövlət ittihamçısıyla Həsənov arasında mübahisə yaranıb:
“Mən elə ittihamdan danışıram. Mənə ağıl öyrətməyin. Bundan sonra 40 il lazımdır ki, mənə məsləhət verəsən, başa düşdün? Yerini, həddini bil...”
Bu mübahisədən az sonra Həsənovun durumu pisləşib və o, müvazinətini saxlaya bilməyib. Bu üzdən məhkəməyə təcili yardım çağrılıb.
Bu iş üzrə növbəti məhkəmə iclası sentyabrın 17-nə təyin edilib.
Xatırlatma
1995-2000-ci illərdə Azərbaycanın Baş prokuroru, daha sonra isə 12 il Rumıniyada, 2013-cü ildən də Serbiya, Monteneqro, Bosniya və Herseqovinadakı səfiri olan Eldar Həsənov 2020-ci il avqustun 13-də saxlanılıb.
O, DTX-da istintaqı aparılan Xarici İşlər Nazirliyinin əməkdaşları haqqında cinayət işi üzrə məsuliyyətə cəlb edilib. Avqustun 24-də Həsənov haqqında cinayət işi həmin işdən ayrılıb.
Həsənovun ittiham olunduğu maddələrdə 10 ilə qədər azadlıqdan məhrumetmə cəzası nəzərdə tutulub.
