Avropa Komissiyasının Prezidenti Ursula von der Leyen gələn ilin ortasınadək Avropa Birliyi üzvü olmayan ölkələrə COVID-19-a qarşı əlavə 200 milyon doza vaksin ianə ediləcəyini açıqlayıb.
“İlkin və ən vacib prioritetimiz qlobal vaksinasiyanı sürətləndirməkdir”, – von der Leyen sentyabrın 15-də blok rəhbərliyinə gələndən sonra ikinci müraciətində deyib.
Vaksinasiya fərqi
AB indiyədək 250 milyon doza ianə etmək öhdəliyi götürüb.
Ötən ayın sonunadək 27 üzvü olan AB-də yetkin yaşlı əhalinin 70 faizinin COVID-19-a qarşı tam peyvənd olunduğu bildirilib.
Ancaq von der Leyen AB üzvləri arasında vaksinasiya fərqindən narahatlığını dilə gətirib.
Almaniyanın keçmiş müdafiə naziri olan von der Leyen Strasburqda Avropa Parlamentində çıxış edib. İki ildir AB pandemiya, kəskin iqtisadi geriləmə, blokdan çıxışla bağlı gərginlik yaşayır.
AB-nin 19 üzvünün iqtisadi göstəricilərinin bu il pandemiyadan öncəki səviyyəyə yüksələcəyi gözlənir, digərlərində isə bu, gələn il qeydə alınacaq.
