İcra hakimiyyətləri təkzib edirlər
Ağsu rayonunda yerli sakinlər tərəfindən etiraz aksiyası keçirilməyib. Bu barədə APA-ya rayon İcra Hakimiyyəti başçısının birinci müavini Rasim Novruzov bildirib.
Onun sözlərinə görə, rayonun bir qrup sakini qiymət artımı, əsasən də unun qiymətinin artırılması ilə bağlı İcra Hakimiyyətinə gəlib.
Sakinlər Ağsu rayon İcra Hakimiyyətinin başçısı Ənvər Seyidəliyev tərəfindən qəbul olunub. İH başçısı sakinləri dinləyib, onlara bildirib ki, süni qiymət artımının qarşısı alınacaq. Sahibkarlarla bununla bağlı görüş keçirilib.
Məlumata görə, son günlər rayonda unun qiymətində artım olsa da, hazırda 50 kiloqramlıq un kisələri 27 manat 50 qəpiyə satılır.
“Füzulidə baş verən etiraz aksiyasına səbəb qiymət artımıdır”. Bunu APA-ya açıqlamasında Füzuli rayon İcra Hakimiyyəti başçısının birinci müavini Bağır Aslanov deyib.
B. Aslanov qeyd edib ki, rayon icra hakimiyyəti rəhbərliyinin sakinlərlə apardığı danışıq nəticəsində etirazçılar dağılışıb: "Saxlanılan və xəsarət alan olmayıb”.
Siyəzəndə də sabitlik təmin olunub. Bunu APA-ya açıqlamasında Siyəzən rayon İcra Hakimiyyəti başçısının müavini Zəfər Əliyev bildirib.
O qeyd edib ki, rayonda keçirilən aksiyada ölən və yaralananların olması barədə yayılan informasiyalar həqiqətə uyğun deyil: “Bu barədə yayılan məlumatlar yalandır. Hazırda rayonda sakitlik bərpa olunub, hər şey nəzarət altındadır”.
Arif Hacılını "Bandotdel"ə çağırdılar
Yanvarın 13-də DİN-in Baş Mütəşəkkil Cinayətkarlıqla Mübarizə İdarəsinə dəvət olunan Müsavat başqanı Arif Hacılı artıq oranı tərk edib.
Bu barədə AzadlıqRadiosuna məlumat verən başqan müavini Elman Fəttah deyir ki, partiya yaxın vaxtda bununla bağlı rəsmi məlumat yayacaq:
“Bu gün saat 1-də Baş Mütəşəkkil Cinayətkarlıqla Mübarizə İdarəsinin nümayəndələri qərargaha gəlib idarə rəisi general Seyfulla Əzimovun Arif Hacılı ilə görüşmək istədiyini bildirdi. Rəisin başqanla hansı məsələni müzakirə etmək istədiyi barədə isə əlavə məlumat verilmədi”.
Məsələnin bölgələrdə baş qaldıran etirazlarla bağlı olub-olmadığı hələ ki bilinmir. Bəzi rayonlarda polis etirazlarla bağlı müxalifətçiləri də saxlayıb.
Füzulidə etirazlar - Video
Yanvarın 13-də Füzuli rayonunun Bala Bəhmənli kəndində də bahalaşma və işsizliyə etiraz olaraq aksiya keçirilib. Videonu təqdim edirik (MeydanTV)
Lənkəranda saxlananlar məhkəməyə aparılır
Yanvarın 12-də saxlanan AXCP Lənkəran şöbəsinin sədri Nazim Həsənli və Müsavat Partiyasının yerli təşkilatının sədri İman Əliyev məhkəməyə aparılıblar.
Bu barədə AzadlıqRadiosuna tutulanların yaxınları məlumat verib. Məlumatda həmçinin qeyd edilir ki, Lənkəran rayon Məhkəməsində onlar İnzibati Xətalar Məcəlləsinin 298-ci maddəsi ilə, yəni qanunsuz kütləvi aksiya keçirməkdə ittiham edilirlər.
Yanvarın 12-də Lənkəran rayonunun Liman şəhər sakinləri Bakı-Astara yolunu bağlayaraq qiymətlərin qalxmasına etirazlarını bildirmişdilər. Aksiya iştirakçıları ilə rayon rəsmilərinin danışıqlarından sonra yol açılmışdı.