Yanvarın 5-də Minskdə Nobel Sülh Mükafatı laureatı Ales Byalyatski və daha üç nəfərin məhjəməsi başlanır. 60 yaşlı Byalyatski “Vyasna-1996” insan haqları qrupunun təsisçisidir.
Onunla birlikdə Vyasna-nın üç işçisi mühakimə olunur. Onlar antihökumət etirazlarını maliyyələşdirməkdə və pul qaçaqçılığında ittiham olunur, 12 ilədək həbsə məhkum edilə bilərlər. Təqsirləndirilənlərdən biri qiyabi mühakimə edilir.
Hüquqi və maliyyə yardımı
Tərəfdarları ittihamların siyasi qisasçılıq məqsədi daşıdığını deyirlər, ancaq Byalyatski özü ittihamları şərh etməyib. Onun vəkilinə isə işlə bağlı informasiya vermək qadağan olunub.
Alyaksandr Lukaşenka 2020-ci ilin avqustunda prezident seçkisinin qalibi elan olunandan sonra ölkədə kütləvi etirazlar başlanıb, yüzlərlə belaruslu saxlanıb, işgəncə görüb.
Byalyatski “Vyasna-1996”nın iki əməkdaşı ilə birlikdə 2021-ci ildə saxlanıb.
“Vyasna-1996” etirazlar vaxtı saxlanmış yüzlərlə belarusluya hüquqi və maliyyə yardımı göstərib. Qurum əməkdaşlara ittihamların onsan insan haqları fəaliyyəti ilə bağlı olduğunu bildirir.
50 minədək saxlanan olub
Byalyatski və həmkarları insan haqları müdafiəçilərinin “siyasi məhbus” siyahısına salınıblar. Hazırda Belarus həbsxanalarında 1500-dək siyasi məhbusun olduğu bildirilir.
İnsan haqları müdafiəçiləri 2020-ci ildən etirazlarda iştiraka və hakimiyyəti tənqid etməyə görə 50 minədək insanın saxlandığını deyirlər.
2022-ci ilin Nobel mükafatı Byalyatski ilə birlikdə Rusiyanın “Memorial” insan haqları qrupuna və Ukrayna Mülki Azadlıqlar Mərkəzinə verilib.
