Mərkəzi Seçki Komissiyasından (MSK) verilən məlumata görə, prezident seçkilərini izləmək üçün ümumilikdə 90 mindən artıq müşahidəçi qeydiyyatdan keçib. Onlardan 800 nəfərə yaxını beynəlxalq müşahidəçilərdir.
İlkin nəticələrinin 21:00-da açıqlanması gözlənilir
Bu gözləntini fevralın 7-də səsvermə başladıqdan sonra keçirdiyi mətbuat konfransında Mərkəzi Seçki Komissiyasının (MSK) sədri Məzahir Pənahov dilə gətirib. Onun sözlərinə görə, seçki məntəqələrinin 50-60 faizindən nəticələr MSK-nın monitorunda öz əksini tapdıqdan sonra ilkin mənzərə artıq aydınlaşacaq.
Onun deməsinə görə, bu vaxta qədərki təcrübəyə əsasən bunun axşam saat 9-da mümkün olacağı gözlənilir.
Azərbaycanda növbədənkənar prezident seçkiləri başladı
Bu gün, fevralın 7-si Azərbaycanda növbədənkənar prezident seçkiləri keçirilir. Səsvermə saat 8:00 radələrində başlayır, 19:00-da başa çatmalıdır. Prezidentliyə 7 namizəd qeydə alınıb. Bunlar hazırkı prezident, Yeni Azərbaycan Partiyasının (YAP) sədri İlham Əliyev, deputat Zahid Oruc, Böyük Quruluş Partiyasının sədri, deputat Fazil Mustafa, Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyev, Milli Cəbhə Partiyasının sədri, deputat Razi Nurullayev, Böyük Azərbaycan Partiyasının sədri Elşad Musayev və keçmiş Azərbaycan Liberal Demokrat Partiyasının sədri Fuad Əliyevdir.
Qanunvericiliyə əsasən, növbəti prezident seçkiləri 2025-ci ildə keçirilməli idi. Prezident İlham Əliyev seçkinin tarixinin bir il önə çəkilməsini artıq Azərbaycanın bütün ərazilərində suverenliyin bərpa olunması ilə izah edib. (2020-ci ildə Ermənistanla 44 günlük savaş, ötən il isə qısa hərbi əməliyyatlarla Dağlıq Qarabağ və ətraf 7 rayon işğaldan azad edilib)
Azərbaycan Xalq Cəbhəsi Partiyası (AXCP), Müsavat kimi bəzi müxalifət qüvvələri bunu "qəfil seçki" adlandıraraq hakimiyyətin əslində rəqabətli, sivil mübarizəyə hazır olmadığını bəyan edirlər. Onlar bu seçkilərdə iştirak etməyəcəklərini açıqlayıblar. Rəsmilər isə deyir ki, ölkədə azad və ədalətli seçkilər üçün bütün imkanlar var.