Bu gün – dekabrın 13-də Türkiyə lirəsi 7% dəyər itirib, 1 dollar 15 lirəyə yaxınlaşıb. “Reuters” bu düşüşün bu həftə uçot dərəcəsinin yenidən azaldılacağı xəbərləri fonunda baş verdiyini yazır.
Bir il öncə lirə indikindən iki dəfə artıq dəyərə malik idi.
Son iki həftədə mərkəzi bank lirəni 14.0 səviyyəsində saxlamışdı, üç dəfə dollar satmaqla xarici valyuta bazarına müdaxilə etmişdi. Bazar ertəsi səhər isə heç bir müdaxilənin olunmayacağı açıqlanıb.
Faiz dərəcəsi 14%-ə salına bilər
Bu gün səhər lirə dollara qarşı 14.99-a düşüb, sonradan 14.2895 həddində qərarlaşıb.
Bu həftə mərkəzi bankın faiz dərəcəsini 100 bənd azaldaraq 14%-ə salacağı gözlənir. Bu haqda “Reuters” ötən cümə günü yazıb. Ötən aysa inflyasiya 21.3%-ə yüksəlib.
Mərkəzi bankın Prezident Rəcəb Tayyib Ərdoğanın təzyiqilə sentyabrdan uçot dərəcəsini 400 bənd azaltması investorların və əmanətçilərin əndişəsini artırıb.
İqtisadçıların və müxalifətdən olan siyasətçilərin tənqidlərinə baxmayaraq, Ərdoğan faiz dərəcələrinin azaldılmasında israr edir. Onun yeni iqtisadi planı iqtisadi artım, kredit, istehsal və ixraca fokuslanır.
