-
«Builki büdcənin gəlirləri 15 milyard 738.6 milyon manat nəzərdə tutulur. Bu, təsdiqlənmiş büdcəyə nisbətən 981.5 milyon manat və ya 5.9 faiz azdır. Azalma, əsasən, bir barrel xam neftin qiymətinin təsdiq edilən proqnozla müqayisədə 2 dəfə aşağı götürülməsi nəticəsində Dövlət Neft Fondu gəlirlərinin 3 milyard 230.3 milyon manat azalması hesabınadır».
Maliyyə naziri Samir Şərifov dövlət büdcəsinə dəyişikliklər parlamentin komitə iclasında müzakirə edilərkən belə deyib.
AZƏRTAC bildirib ki, maliyyə naziri yeni büdcədə neftin baza qiymətini 25 dollardan götürüb. Bu üzdən dövlət büdcəsinin gəlirlərində neft sektorundan daxilolmalar azalıb. Büdcə daxilolmalarının tərkibində neftdənkənar sektorun gəlirləri 7 milyard 597 milyon manat nəzərdə tutulub. Bu, ötən illə müqayisədə 659.2 milyon manat çoxdur.
Maliyyə naziri bunu da söyləyib ki, Vergilər Nazirliyinin xətti ilə 2016-cı ildə dövlət büdcəsinə ötən ilə nisbətən 108.3 milyon manat az - 7 milyard 10 milyon manat daxil olmalıdır. Büdcəyə Dövlət Gömrük Komitəsinin xətti ilə 1 milyard 810 milyon manat, başqa sahələrdən 75 milyon manat daxilolma proqnozlaşdırılır.
Parlament komitəsi büdcəyə dəyişiklikləri plenar iclasa tövsiyə edib.
