Azərbaycanda növbədənkənar prezident seçkiləri

AŞPA-nın deputatı, Azərbaycan üzrə keçmiş həmməruzəçi Stefan Şennax deyir ki, o, nə Əliyevin erkən seçki qərarını, nə də seçkiyə qoyulan məhdudiyyətləri başa düşür: "Mən anlamıram... O, 99 faiz səs toplamaq istəyir?! Demokratiyada 70-85 faiz səs toplamaq normaldır. Məncə, İlham Əliyevə də bu qədər bəsdir... Prezident Əliyev Qarabağdakı qələbəsindən istifadə edib erkən seçki keçirmək qərarına gəldi, amma indi heç müxalifət namizədi də yoxdur. Mən anlamıram ki, o, niyə belə həyəcanlıdır? Axı onun buna ehtiyacı yoxdur. O, onsuz da güclüdür və Əliyev ailəsi ölkəyə nəzarət edir".

Prezident seçkisində son durum nədir? Seçkilər necə gedir? Ekspertlər seçkiləri necə dəyərləndirir?

Saat 19:00-a olan yekun məlumata görə, respublika üzrə seçicilərin 76.73 faizi (4 milyon 971 min 32 nəfər) səs verib. /MSK/

Müxalifətdə olan və seçkilərə qatılmayan Müsavat Partiyası bəyanat yayaraq bildirib ki, növbədənkənar prezident seçkiləri azad və ədalətli olmayıb.

Bəyanatda deyilir ki, partiya onun nəticələrinin ləğv edilməsini istəyir və "Azərbaycan xalqının azad iradəsini əks etdirən və beynəlxalq standartlara cavab verən prezident seçkilərinin keçirilməsini tələb edir".